ട്വന്റി 20 പാർട്ടി മലബാർ മേഖലയിലും സജീവമാകുന്നു ; സണ്ണി തോമസിന് വടക്കൻ മേഖലയുടെ ചുമതല
കോഴിക്കോട് : സമഗ്ര വികസനവും, ജനക്ഷേമവും മുൻനിർത്തി സാബു ജേക്കബിന്റെ നേതൃത്വത്തിൽ പ്രവർത്തിക്കുന്ന രാഷ്ട്രീയ പ്രസ്ഥാനം ട്വന്റി 20 പാർട്ടി മലബാർ മേഖലയിലേക്കും സജീവമാകുന്നു. 10 വർഷത്തെ പാർട്ടിയുടെ പ്രവർത്തനത്തിനുള്ളിൽ തന്നെ വികസനത്തിന് ട്വന്റി 20 മോഡൽ എന്ന ഖ്യാതി നേടി പാർട്ടി സംസ്ഥാനത്തെങ്ങും വ്യാപിക്കുന്നതിൻ്റെ ഭാഗമായാണ് വടക്കൻ കേരളത്തിലേക്ക് പ്രചരണം ശക്തമാക്കുന്നത്. മലബാറിലെ 7 ജില്ലകളിലെ മണ്ഡലങ്ങളിലും പാർട്ടി ശ്രദ്ധ നൽകാനാണ് തീരുമാനം. ട്വന്റി 20 പാർട്ടിയുടെ പ്രവർത്തനത്തിൽ അകൃഷ്ടരായി നിരവധി പ്രവർത്തകരും, പ്രസ്ഥാനങ്ങളും പാർട്ടിയിലേക്ക് നിത്യേന കടന്നുവരികയാണ്. ഇതിൻ്റെ തുടർച്ചയായി എൻ സി പി(അജിത് പവർ വിഭാഗം ) യുടെ നിരവധി നേതാക്കളും, പ്രവർത്തകരും പാർട്ടിയിൽ ചേർന്നു. എൻ സി പി അഖിലേന്ത്യാ സെക്രട്ടറി സണ്ണി തോമസ്, സംസ്ഥാന ജനറൽ സെക്രട്ടറിമാരായ ജോണി തോട്ടക്കര, ജേക്കബ് പുതുപ്പള്ളി, ജില്ലാ അധ്യക്ഷൻമാരായ നാദിർഷാ കടായ്ക്കര(മലപ്പുറം ), രവി കുളങ്ങര (കാസർഗോഡ് ) എന്നിവരും നിരവധി പ്രവർത്തകരും പാർട്ടി അധ്യക്ഷൻ സാബു ജേക്കബിൽ നിന്നും മെമ്പർഷിപ്പ് ഏറ്റുവാങ്ങി, പാർട്ടിയുടെ ഭാഗമായതായി പാർട്ടി ഉപാധ്യക്ഷൻ വി ഗോപകുമാർ പത്ര സമ്മേളനത്തിൽ അറിയിച്ചു. സണ്ണി തോമസിനാണ് പാർട്ടിയുടെ വടക്കൻ ജില്ലകളുടെ ചുമതല. രവി കുളങ്ങര കാസർഗോഡ് ജില്ലയുടെയും നദിർഷ കടായ്ക്കൽ മലപ്പുറം ജില്ലയുടെയും ചുമതല വഹിക്കും . എൻ സി പി യിൽ നിന്നും എത്തിയ ജോണി തൊട്ടക്കര (എറണാകുളം ), ജേക്കബ് പുതുപ്പള്ളി (കോട്ടയം ) എന്നിവരെയും ‘അതത് ജില്ലാ കോർഡിനേറ്റർമാരാകും. എൻ ഡി എ യുടെ ഭാഗമായ ട്വന്റി 20 പാർട്ടി ഈ വരുന്ന സംസ്ഥാന നിയമസഭ തിരഞ്ഞെടുപ്പിൽ ജനം അംഗീകരിക്കുന്ന, പ്രതിഫലേച്ച കൂടാതെ ജനങ്ങൾക്ക് വേണ്ടി പ്രവർത്തിക്കുന്ന വ്യക്തിത്വങ്ങളെ അണിനിരത്തി തിരഞ്ഞെടുപ്പിനെ നേരിടും. കേരളത്തിലെ ഭൂരിപക്ഷം ജനത എൻ ഡി എ മുന്നോട്ട് വെക്കുന്ന വികസന രാഷ്ട്രീയം ഏറ്റെടുക്കുമെന്ന് ട്വിൻ്റി 20 പാർട്ടി നേതാക്കൾ പറഞ്ഞു. പത്ര സമ്മേളനത്തിൽ ട്വന്റി 20 പാർട്ടി സംഘടന ചുമതലയുള്ള സംസ്ഥാന ഉപാധ്യക്ഷൻ വി ഗോപകുമാർ, മേഖല കോർഡിനേറ്റർ സണ്ണി തോമസ് , ജോണി തോട്ടക്കര , രവി കുളങ്ങര , നാദിർഷ കടായ്ക്കൽ , എന്നിവർ പങ്കെടുത്തു.
